తెలంగాణ ప్రభుత్వం ప్రవేశపెట్టిన బడ్జెట్ రేవంత్ రెడ్డి అసమర్థతకు, పరిపాలన వైఫల్యానికి నిలువుటద్దం అని బీఆర్ఎస్ వర్కింగ్ ప్రెసిడెంట్ కేటీఆర్ (BRS Working President KTR) తీవ్రంగా విమర్శించారు. నమ్మి ఓటేసిన పాపానికి నాలుగు కోట్ల మందిని కాంగ్రెస్ నిలువునా ముంచిందని ఆరోపించారు. పదేళ్ల ప్రగతి రథచక్రానికి పంచర్ చేసిన బడ్జెట్ ఇదని మండిపడ్డారు. ఇచ్చిన మాటకు కాకుండా.. ఢిల్లీకి మూటలు పంపడం పైననే బడ్జెట్‌లో దృష్టి పెట్టారని ఆరోపించారు. తెలంగాణ ప్రయోజనాలు, ప్రజల సంక్షేమానికి పెను ముప్పులా ఉన్న 40 శాతం కమిషన్ కాంగ్రెస్ బడ్జెట్‌ను బీఆర్ఎస్ పార్టీ వ్యతిరేకిస్తుందని స్పష్టం చేశారు.
రాష్ట్రంలోని పేదలు, ఆడబిడ్డలు, రైతులు, రాష్ట్ర బడ్జెట్ పట్ల ఎంతో ఆశతో ఎదురుచూశారని, కానీ భట్టి విక్రమార్క గంటన్నర సుదీర్ఘ ఉపన్యాసం తర్వాత ఆరు గ్యారంటీలు గోవిందా గోవిందా అని అర్థమైందని కేటీఆర్ ఆరోపించారు. నూరు రోజుల్లో ఆరు గ్యారంటీలు అనే మాటకు పాతర వేశారని విమర్శించారు. నెలకు 2500 రూపాయలు ఇస్తామని ఏ మహిళలకైతే కాంగ్రెస్ ప్రభుత్వం హామీ ఇచ్చిందో, ఇప్పుడు ఆ మహిళలంతా ఈ బడ్జెట్‌ను చూసి షాక్ అయ్యారని అన్నారు. వంద రోజుల్లో 4000 రూపాయల పెన్షన్ వస్తుందని ఎదురుచూసిన వృద్ధులకు నిరాశ మిగిలిందని చెప్పారు.
ఏ హామీలను ఇచ్చి అధికారంలోకి వచ్చిందో, ఆ హామీల గురించి బడ్జెట్‌లో కాంగ్రెస్ ప్రభుత్వం అసలు ప్రస్తావించలేదని కేటీఆర్ అన్నారు. ఆరు గ్యారంటీలు నూరు రోజులు అని సొల్లు పురాణం చెప్పి, అఫిడవిట్లు రాసి, దేవుని ముంగట పెట్టి, ఆ అఫిడవిట్లే తమకు భగవద్గీతతో సమానమని అబద్ధాలు చెప్పి, ఓట్లు వేయించుకొని గెలిచి, ఇప్పుడు ఆ హామీలకు పాతర వేశారని ఆరోపించారు. తులం బంగారం దిక్కులేదు, నెలకు 2500 రూపాయల మహాలక్ష్మి దిక్కులేదు, నెలకు 4000 రూపాయల పెన్షన్ ఊసే లేదని చెప్పారు.
కేసీఆర్ ప్రభుత్వంలో నేతన్నకు పెద్దపీట వేస్తూ చేనేతకు పెట్టిన బడ్జెట్ 1200 కోట్ల రూపాయలని, కానీ ప్రస్తుత బడ్జెట్‌లో వారికి కేవలం 370 కోట్లు మాత్రమే కేటాయించారని కేటీఆర్ అన్నారు. ఫ్రీ బస్సుతో ఓవైపు 100 మందికి పైగా ఆటో డ్రైవర్లు ఆత్మహత్య చేసుకున్నారని, కానీ వారికి హామీ ఇచ్చిన ఆటో డ్రైవర్ల సంక్షేమ బోర్డు గురించి ఈ బడ్జెట్‌లో అతీగతి లేదని విమర్శించారు. రాష్ట్రవ్యాప్తంగా ఎనిమిది లక్షల మంది ఆటో డ్రైవర్లు తీవ్ర ఇబ్బందులు పడుతుంటే, వాళ్ల గురించి ఒక్క మాట కూడా మాట్లాడలేదని చెప్పారు. స్విగ్గీ, జొమాటో లాంటి గిగ్ వర్కర్ల కోసం ఒక బోర్డు పెడతామని రాహుల్ గాంధీ స్వయంగా చెప్పారని, వారి గురించి కూడా ఒక మాట లేదని అన్నారు.
73 శాతం ఫిట్‌మెంట్‌లో కేసీఆర్ రాష్ట్ర ప్రభుత్వ ఉద్యోగులకు న్యాయం చేస్తే, వారికి ఇంకా ఎక్కువ న్యాయం చేస్తామని అధికారంలోకి వచ్చి వారి గురించి బడ్జెట్‌లో ఒక మాట కూడా చెప్పలేదని కేటీఆర్ అన్నారు. పీఆర్సీ గురించి కానీ, పెండింగ్‌లో ఉన్న ఐదు డీఏల గురించి కానీ ఒక మాట కూడా ప్రభుత్వం ప్రస్తావించలేదని చెప్పారు. కులగణన పేరుతో బీసీల సంఖ్యను తక్కువ చేసి చూపించి, కాంగ్రెస్ ప్రభుత్వం వారిని దారుణంగా మోసం చేసిందని ఆరోపించారు. యాదవ సోదరులకు ఇస్తానన్న గొర్ల గురించి, వైన్ షాపుల్లో 25 శాతం రిజర్వేషన్ ఇస్తానని గౌడ్ అన్నలకు ఇచ్చిన హామీని ఈ బడ్జెట్‌లో పట్టించుకోలేదని చెప్పారు. అంబేద్కర్ అభయ హస్తం పేరుతో 12 లక్షలు దళితులకు ఇస్తామని గొప్పగా చెప్పుకొని, దళితులకు వెన్నుపోటు పొడుస్తూ, ఈ బడ్జెట్‌లో అంబేద్కర్ అభయ హస్తం గురించి మాట మాత్రం కూడా ప్రస్తావించలేదని అన్నారు.
మొదటి సంవత్సరంలోనే రెండు లక్షల ఉద్యోగాలు ఇస్తామని రాహుల్ గాంధీ అశోక్ నగర్‌లో హామీ ఇచ్చారని, కానీ ఇవాళ నిరుద్యోగుల ఊసే ఎత్తడం లేదని కేటీఆర్ అన్నారు. కేసీఆర్ ప్రభుత్వ హయాంలో ఇచ్చిన నోటిఫికేషన్లు, చేసిన రిక్రూట్‌మెంట్లుకు అపాయింట్‌మెంట్ లెటర్లు ఈ ప్రభుత్వం ఇస్తూ తమ ఘనతగా చెప్పుకుంటుంటే నిరుద్యోగులు నవ్వుకుంటున్నారని చెప్పారు. నిరుద్యోగ భృతి గురించి బడ్జెట్‌లో లేదని, 5 లక్షల విద్యా భరోసా కార్డు ప్రస్తావన లేదని అన్నారు. ఉన్న గురుకులాలనే నడపలేని అసమర్థులు 83 పైచిలుకు గురుకుల విద్యార్థులు చచ్చిపోతే ఏమి చేయలేని అసమర్థులు కొత్త స్కూళ్లు కడతామని బిల్డప్ ఇవ్వడం సిగ్గుచేటని విమర్శించారు.
ఈరోజు హైదరాబాద్ మహానగరం అద్వాన నగరంగా మారిందని, మున్సిపల్ శాఖను నిర్వహిస్తున్న రేవంత్ రెడ్డి అసమర్థతతో పనులన్నీ పెండింగ్‌లో పడిపోయాయని కేటీఆర్ ఆరోపించారు. పేదలు ప్రభుత్వ ఆసుపత్రులకు వెళితే కనీసం గోలీలు ఇచ్చే దిక్కులేదని, తెలంగాణ ఆర్థిక వ్యవస్థను ఈ కాంగ్రెస్ ప్రభుత్వం చిన్నాభిన్నం చేసిందని విమర్శించారు. ట్రిలియన్ డాలర్ ఆర్థిక వ్యవస్థ చేస్తామని చెప్పుకుంటున్న కాంగ్రెస్ నేతలకు ట్రిలియన్‌లో ఎన్ని సున్నాలు ఉంటాయో కూడా తెలియదని, ట్రిలియన్ డాలర్లు అప్పు మాత్రం చేసేలాగా ఉన్నారని ఎద్దేవా చేశారు.
కేసీఆర్ ప్రభుత్వం 10 ఏళ్లలో నాలుగు లక్షల 17 వేల కోట్ల రూపాయల అప్పు చేస్తే, ఆరోజు కాంగ్రెస్ నేతలు కారు కూతలు కూశారని, కానీ కాంగ్రెస్ ప్రభుత్వం ఒకే ఒక్క సంవత్సరంలో లక్ష 60 వేల కోట్లు చేసిందని, ముఖ్యమంత్రి అసెంబ్లీలోనే ఒప్పుకున్నారని కేటీఆర్ అన్నారు. 20 శాతం కమిషన్ పాలన దేశానికి సిగ్గుచేటని, ఆరు గ్యారంటీల అమలును పక్కనపెట్టి ఢిల్లీకి మూటలు పంపడానికి ప్రవేశపెట్టిన బడ్జెట్ ఇదని ఆరోపించారు. మూసీ లూటిఫికేషన్ మాత్రమే రేవంత్ ప్రథమ ప్రాధాన్యమని, ఆ లూటిఫికేషన్ ద్వారానే ఢిల్లీకి మూటలు పంపుతున్నారని విమర్శించారు.
Also Read…| హైదరాబాద్‌లో మెక్‌డొనాల్డ్స్ పెట్టుబడులు.. ప్రభుత్వంతో ఒప్పందం
ఏ ఒక్క ఊర్లోనైనా వందకు వంద శాతం రుణమాఫీ జరిగిందని రుజువు చేస్తే తమ శాసన సభ్యత్వాలను వదులుకుంటామని చేసిన చాలెంజ్‌కు ప్రభుత్వం ఇప్పటిదాకా స్పందించలేదని కేటీఆర్ అన్నారు. కోటిమంది రైతు కూలీలకు 12,000 ఇస్తామని హామీ ఇచ్చి, దాని గురించి ప్రభుత్వం పట్టించుకోలేదని, కానీ బడ్జెట్‌లో మాత్రం దాన్ని ప్రారంభించామని చెప్పుకుంటున్నారని విమర్శించారు. ఏ ఒక్క గ్రామంలోనైనా రైతు కూలీలు తమకు 12,000 రూపాయలు వచ్చాయని చెప్తే ఏ శిక్షకైనా సిద్ధమని అన్నారు. నిన్నటిదాకా 20 శాతం కమిషన్‌గా ఉన్న ప్రభుత్వాన్ని, 40 శాతం కమిషన్ ప్రభుత్వంగా మార్చి ఢిల్లీకి మూటలు పంపేందుకు ప్రవేశపెట్టిన బడ్జెట్ ఇదని ఆరోపించారు.
రేవంత్ తెలివి తక్కువతనం వల్ల ప్రభుత్వ అసమర్థత వల్లనే 73 వేల కోట్ల ఆదాయం పడిపోయిందని, రేవంత్ రెడ్డి నెగిటివ్ పాలసీస్, నెగిటివ్ పాలిటిక్స్ వలన తెలంగాణ రాష్ట్ర ఆదాయం తగ్గిందని కేటీఆర్ అన్నారు. మీడియా ముందు రంకెలు వేసే రేవంత్ రెడ్డి అంకెలు ఎందుకు ఆగమయ్యాయో చెప్పాలని డిమాండ్ చేశారు. తమ బడ్జెట్ వాస్తవాలకు దగ్గరగా ఉందని, నేల విడిచి సాము చేయలేదని, గాల్లో మేడలు కట్టడం లేదని గత బడ్జెట్‌లో భట్టి విక్రమార్క గొప్పగా చెప్పుకున్నారని, కానీ బడ్జెట్ ఎందుకు అంచనాలకు చేరుకోలేకపోయిందని, 73 వేల కోట్ల ఆదాయం తగ్గిందని ముఖ్యమంత్రి ఎందుకు చెప్తున్నారో భట్టి విక్రమార్క సమాధానం చెప్పాలని కేటీఆర్ డిమాండ్ చేశారు.
