మండి ఎంపీ, నటి కంగనా రనౌత్ చేసిన వ్యాఖ్యలు మరోసారి చర్చనీయాంశమయ్యాయి. కంగనా రనౌత్ ఎంపీలకు జీతం సరిపోవడం లేదు అని, ఎంపీలకు కేంద్రం ఇచ్చే జీతం తమ ఖర్చులకు ఏమాత్రం సరిపోదని ఆమె అభిప్రాయపడ్డారు. నియోజకవర్గాల్లో పర్యటించడానికి, సిబ్బందితో కలిసి ప్రయాణించడానికి లక్షల్లో ఖర్చవుతుందని ఆమె వివరించారు. ఒక ప్రాంతం నుంచి మరో ప్రాంతానికి 300-400 కిలోమీటర్లు ప్రయాణించాల్సి వస్తుందని, ఇవన్నీ కలిపి భారీ వ్యయంగా మారుతాయని ఆమె పేర్కొన్నారు. రాజకీయాలు అనుకున్నంత సులువు కాదని, చాలా ఖరీదైనవని ఆమె వ్యాఖ్యానించారు.
ఎంపీలు మరో ఉద్యోగం లేదా వ్యాపారం చేసుకోవాలని కంగనా సూచించారు. అదనపు ఆదాయ వనరులు లేకపోతే రాజకీయాల్లో నెట్టుకురావడం చాలా కష్టమని ఆమె అభిప్రాయపడ్డారు. ప్రస్తుతం చాలా మంది ఎంపీలకు వ్యాపారాలు ఉన్నాయని, కొందరు న్యాయవాదులుగా కూడా పనిచేస్తున్నారని ఆమె గుర్తు చేశారు. అలా చేయని పక్షంలో ఆర్థిక ఇబ్బందులు ఎదుర్కోవాల్సి వస్తుందని ఆమె అన్నారు.
కంగనా వ్యాఖ్యలు ఎంపీల ఆర్థిక స్థితి, వారి బాధ్యతలపై కొత్త చర్చకు దారితీశాయి. ప్రజా ప్రతినిధులుగా వారి జీతం, ఖర్చులు, అదనపు ఆదాయ వనరులు వంటి అంశాలపై భిన్నాభిప్రాయాలు వ్యక్తమవుతున్నాయి. ప్రజల అంచనాలు, ఎంపీల వాస్తవ ఆర్థిక పరిస్థితుల మధ్య ఉన్న అంతరాన్ని ఈ వ్యాఖ్యలు మరోసారి స్పష్టం చేస్తున్నాయి.
