బీఆర్ఎస్‌ ను ఓడించ‌డ‌మే ల‌క్ష్యంగా హైదరాబాద్ జ‌ర్న‌లిస్ట్ లోక్ స‌భ ఎన్నిక‌ల బ‌రిలో నిలిచారు. మెద‌క్ పార్ల‌మెంట్ స్థానానికి సీనియ‌ర్ జ‌ర్న‌లిస్ట్ మారేప‌ల్లి ల‌క్ష్మ‌ణ్ నేత గురువారం స్వ‌తంత్ర అభ్య‌ర్థిగా నామినేష‌న్ వేశారు. బీఆర్ఎస్ గ‌ట్టి ప‌ట్టున్న మెద‌క్ లో, ఆ పార్టీ గెలుపు ఆశ‌లు ఉన్న ఈ స్థానంలో బీఆర్ఎస్ అభ్య‌ర్థిని ఓడించ‌డ‌మే ల‌క్ష్యంగా నామినేష‌న్ దాఖ‌లు చేశారు. కేంద్ర ఎన్నిక‌ల సంఘం తీసుకువ‌చ్చిన సువిధ పోర్ట‌ల్ ద్వారా ఈనెల 22న ఆన్ లైన్ నామినేష‌న్ వేసిన మారేప‌ల్లి ల‌క్ష్మణ్‌… ఫిజిక‌ల్ గా మెద‌క్ క‌లెక్ట‌రేట్ కువెళ్లి ఎన్నిక‌ల రిట‌ర్నింగ్ అధికారి, కలెక్ట‌ర్ రాహుల్ రాజ్ కు రెండు సెట్ల నామినేష‌న్ ప‌త్రాలు అంద‌జేశారు. మేడ్చ‌ల్-మ‌ల్చాజిగిరి జిల్లా పేట్ బ‌షీరాబాద్లో జ‌ర్న‌లిస్టుల‌కు కేటాయించిన 38 ఎక‌రాల‌ను వారికి అప్ప‌గించాల‌ని సుప్రీంకోర్టు 2022 అగ‌స్టులో స్పష్ట‌మైన తీర్పు ఇచ్చినా.. అప్ప‌టి బీఆర్ఎస్ ప్ర‌భుత్వం పెడ‌చెవిన పెట్టి జ‌ర్నిలిస్టుల‌కు అన్యాయం చేయాల‌ని చూసింది. త‌మ స్థ‌ల సాధ‌న కోసం జ‌వ‌హ‌ర్ లాల్ నెహ్రూ జ‌ర్న‌లిస్టుల హౌసింగ్ సోసైటీ ఎన్నో రూపాల్లో పోరాడింది. ధ‌ర్నాలు చేసింది. చివ‌ర‌కు కేసీఆర్ ప్ర‌భుత్వాన్ని ఓడించ‌డ‌మే ల‌క్ష్యంగా ఇటీవ‌లి అసెంబ్లీ ఎన్నిక‌ల్లో జేఎన్‌జే జ‌ర్న‌లిస్టులు ఆ పార్టీకి వ్య‌తిరేకంగా రాష్ట్ర వ్యాప్తంగా ప్ర‌చారం చేశారు. ఆ ప్ర‌య‌త్నంలో జేఎన్‌జే జ‌ర్న‌లిస్టులు స‌ఫ‌ల‌మై కేసీఆర్ ను ఓడించ‌డంలో త‌మ‌దైన పాత్ర పోషించారు. ఈ లోక్ స‌భ ఎన్నిక‌ల్లోనూ బీఆర్ఎస్ ఓట‌మే ల‌క్ష్యంగా త‌మ కార్యాచ‌ర‌ణ తీసుకుంది. ఇందులో భాగంగా సీనియ‌ర్ జ‌ర‌ల్నిస్టు మారేప‌ల్లి ల‌క్ష్మ‌ణ్ నేత మెద‌క్ లోక్ స‌భ స్థానానికి నామినేష‌న్ వేశారు. బీఆర్ఎస్ అభ్య‌ర్థికి వ్య‌తిరేకంగా ప్ర‌చారం చేస్తాన‌ని మారేప‌ల్లి ల‌క్ష్మ‌ణ్ మీడియాతో చెప్పారు. ఈ లోక్ స‌భ ఎన్నిక‌ల్లో బీఆర్ఎస్ కు ఒక్క సీటు కూడా రాకుండా ముమ్మ‌ర ప్ర‌చారం చేస్తామ‌ని, అధికారంలో ఉన్న‌ప్పుడు కేసీఆర్, కేటీఆర్ చేసిన అరాచ‌కాలను జ‌నాల‌కు తెలియజేస్తామ‌న్నారు. పోరాడి తెచ్చుకున్న తెలంగాణ‌ను నిధులు, నియామ‌కాలు, జ‌లాలు లేకుండా ఎలా ప్ర‌జ‌ల‌ను మోసం చేశారో ప్ర‌చారంలో ప్ర‌జ‌ల చెంత‌కు తీసుకువెళ‌తామ‌ని పేర్కొన్నారు. మారేప‌ల్లి ల‌క్ష్మ‌ణ్ కు ప‌లు జ‌ర్న‌లిస్టు సంఘాలు, కుల సంఘాలు, బీసీ సంఘాలు మ‌ద్ద‌తు ప్ర‌కటించాయి.