హైదరాబాద్ లో సోమవారం మధ్నాహ్నం నుంచి కురుస్తున్న కుండపోత వర్షంతో నగర ప్రజలు తీవ్ర ఇబ్బందులు పడుతున్నారు. సిటీలోని పలు ప్రాంతాలు వర్షపు నీటిలో మునిగిపోయి, అనేక రహదారులు చెరువుల్లా మారిపోయాయి. కుండపోత వర్షం వల్ల నగరంలో ట్రాఫిక్ జామ్ ల వల్ల వాహనదారులకు తీవ్ర ఇబ్బందులు ఎదురయ్యాయి.
ప్రధానంగా, దిల్‌సుఖ్‌నగర్‌, కొత్తపేట, సరూర్‌నగర్‌, ఎల్బీనగర్‌, నాగోల్‌, అల్కాపురి ప్రాంతాల్లో కుండపోత వర్షం కురుస్తోంది. ఖైరతాబాద్, నాంపల్లి, బషీర్ బాగ్, హిమాయత్ నగర్, అబిడ్స్, నాంపల్లి, కుత్బుల్లాపూర్, బాలానగర్‌, గాజులరామారం, జగద్గిరిగుట్ట, బహదూర్ పల్లి, సూరారం, సుచిత్ర, గుండ్ల పోచంపల్లి, పేట్‌ బషీరాబాద్, జీడిమెట్లలో భారీ వర్షం నమోదయింది. వనస్థలిపురం, బిఎన్‌ రెడ్డి నగర్, హయత్‌నగర్‌, పెద్ద అంబర్పేట్, అబ్దుల్లాపూర్‌మెట్‌ ప్రాంతాల్లో రహదారులు పూర్తి స్థాయిలో నీటిలో మునిగిపోయాయి. సోమవారం మధ్యాహ్నం నుంచి ఎడతెరిపి లేకుండా కురుస్తున్న వర్షం వేకువజామున మరింత భారీగా మారింది. ముఖ్యంగా, హైటెక్ సిటీ నుంచి మాదాపూర్ వరకు రోడ్లు చెరువుల్లా మారిపోయాయి.
కుండపోత వర్షం వల్ల నగరంలోని ప్రధాన రహదారులన్నీ జలమయం అయ్యాయి. కొన్ని ప్రాంతాల్లో మోకాలిలోతు వరకు నీరు చేరి, రాకపోకలకు తీవ్ర ఇబ్బందిగా మారింది. కిలోమీటర్ల మేర వాహనాలు నిలిచిపోయి, పోలీసు అధికారులు ట్రాఫిక్ మళ్లించేందుకు చర్యలు తీసుకుంటున్నారు. అంతేకాకుండా, పంజాగుట్టలోని సుఖ్ నివాస్ అపార్టుమెంట్‌పై పిడుగుపాటు పాటు, ఒక కారు ధ్వంసం కావడం, తెగిపడిన విద్యుత్ తీగల వల్ల పలు ప్రాంతాల్లో కరెంటు సరఫరాకు అంతరాయం ఏర్పడింది. పార్సిగుట్టలో వర్షపు నీటిలో కొట్టుకుపోయిన అనిల్ అనే వ్యక్తి మృతదేహం లభ్యమైంది.
జీహెచ్‌ఎంసీ (గ్రేటర్ హైదరాబాద్ మున్సిపల్ కార్పోరేషన్) అధికారులు అత్యవసర సహాయక చర్యలు చేపట్టారు. డీఆర్ఎఫ్ (డిసాస్టర్ రెస్పాన్స్ ఫోర్స్) బృందాలు రంగంలోకి దిగి, సహాయ పనుల్లో నిమగ్నమయ్యాయి. చాలా పాఠశాలలు సెలవు ప్రకటించాయి. మరిన్ని సహాయక చర్యల కోసం, ప్రజలు 040-21111111 మరియు 9000113667 నంబర్లకు సంప్రదించవచ్చు. మునిసిపల్ కార్పొరేషన్, విద్యుత్ సరఫరా నిలిపివేసి, అత్యవసరమైన పరిస్థితుల్లోనే బయటకు రావాలని ప్రజలను కోరుతోంది. వాతావరణ శాఖ అధికారులు రానున్న మూడు రోజుల పాటు నగరంలో భారీ వర్షాలు పడే అవకాశం ఉందని తెలిపారు. ఉరుములు, మెరుపులు, ఈదురుగాలులతో కూడిన వానలు ఉంటాయని పేర్కొన్నారు. ఏమైనా అనవసరంగా బయటకు రావద్దని, లోతట్టు ప్రాంతాల ప్రజలు అప్రమత్తంగా ఉండాలని హెచ్చరించారు.
